សម្ដេចនាយករដ្ឋមន្ត្រី ប្រាប់ប្រជាពលរដ្ឋដែលបានធ្វើប័ណ្ណបើកបរម៉ូតូឲ្យទៅយកប្រាក់វិញ
08-January-2016 | ដោយ មួយឡា
ភ្នំពេញ៖ នាព្រឹកថ្ងៃទី០៧ ខែមករា ឆ្នាំ២០១៦ សម្ដេចនាយករដ្ឋមន្ត្រី ហ៊ុន សែន បានប្រាប់ទៅប្រជាពលរដ្ឋដែលបានបង់ប្រាក់ធ្វើឬអ្នកដែលមានប័ណ្ណបើកបរម៉ូតូប្រភេទកដែលមានកម្លាំង១២៥សេសេចុះក្រោម អាចទៅបើកប្រាក់វិញបានបន្ទាប់ពីរដ្ឋាភិបាលសម្រេចលុបចោលមិនតម្រូវឲ្យអ្នកបើកបរម៉ូតូប្រភេទនេះមានប័ណ្ណបើកបរ។
សម្ដេច ហ៊ុន សែន បានសរសេរនៅលើទំព័រហ្វេសប៊ុករបស់សម្ដេចជាការឆ្លើយតបទៅនឹងសំណួររបស់ប្រជាពលរដ្ឋថា៖ “ប្រសិនបើប្រជាពលរដ្ឋបានបង់លុយសម្រាប់ថ្លៃប្រឡងយកប័ណ្ណបើកបរម៉ូតូ (125CCចុះក្រោម) រួចហើយ ហើយការសម្រេចថ្មីនេះបានកំណត់មិនអោយបង់លុយថ្លៃប័ណ្ណបើកបរគឺសូមប្រជាពលរដ្ឋមកទទួលប្រាក់វិញគ្រប់ៗគ្នា”។
សម្ដេចនាយករដ្ឋមន្ត្រីបន្តទៀតថា៖ “ចំពោះប្រជាពលរដ្ឋដែលបានទទួលប័ណ្ណបើកបរម៉ូតូរួចហើយ (125CC ចុះក្រោម) ប្រសិនបើមានបំណងចង់ទទួលយកលុយវិញគឺរាជរដ្ឋាភិបាលនឹងបង់ថវិកាសងវិញគ្រប់ចំនួនទៅតាមតម្លៃផ្លូវការដែលបានបង់រួចពីមុន”។
សម្ដេចនាយករដ្ឋមន្ត្រីបន្ថែមថាលោកបានណែនាំរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុឲ្យសហការជាមួយរដ្ឋមន្ត្រីក្រសួងសាធារណការនិងដឹកជញ្ជូន ដើម្បីចាត់វិធានការលើបញ្ហានេះឲ្យបានឆាប់បំផុត។
តាមរបាយការណ៍របស់ក្រសួងសាធារណៈការនិងដឹកជញ្ជូន គឺបច្ចុប្បន្នកម្ពុជាមានម៉ូតូចំនួនជាង២លាន៧សែនគ្រឿង ចំណែកអ្នកដែលមានប័ណ្ណបើកបរមានប្រមាណ១សែន៥ម៉ឺននាក់៕ ដោយ មែន កំសត់
ចំនួនអ្នកទស្សនា
- ថ្ងៃនេះ11831
- ម្សិលមិញ14181
- សប្តាហ៍នេះ11831
- ខែនេះ126981
- ឆ្នាំនេះ126981
- សរុប20569437